【香港蘋果日報報導/編輯室報告】

政府今凌晨起對內地入境旅客強制14天檢疫,無病徵者僅要求自律隔離,只抽查不追蹤,隔離人士勢散落社區。有區議員及大型屋苑業委會批評,政府對社區支援及指引不足,灣仔區議會主席楊雪盈舉例,隔離人士的家居垃圾如何清理、清潔工應有何配備,當局全無指引;有管理公司採購衛生用品困難,杏花邨業主委員會副主席、前中學校長李雪英透露,屋苑現時「買到部機,買唔到酒精搓手液。」

楊雪盈指出,灣仔區有大量商住兩用及商業大廈,管理員需要接觸人流多且複雜,民政署上周與區內各屋苑及大廈法團聯絡後,見到戴口罩的管理員增多、消毒措施加強,但隨著越來越多人需要家居隔離,政府指引明顯十分不足,「假設知道有人喺大廈隔離,家居垃圾要點收集、點處理、點運走?前線清潔工要有啲咩裝備?莫講話區內有啲三無大廈,家居垃圾只係掉出街,咁係咪等如喺街上播毒?」

管理公司同樣面對採購困難,楊雪盈透露,有區內房協屋苑的前線管理員、清潔工面臨口罩短缺,「有清潔工今個星期初搵我哋,話公司都唔夠(口罩)派,訂咗嘅貨可能最快都要下星期先到貨」,惟有馬上送出少量口罩應急。楊雪盈強調,前線管理員、清潔工應該被視為重要的抗疫人員,「當管理公司採購失敗,政府都要話畀佢(公司)知,到底可以搵邊個求助。」

港島東大型屋苑杏花邨共有逾6,000戶,業主委員會副主席李雪英指,該管理公司準備工作已算理想,包括已為員工採購少量保護衣,但部份衛生用品仍不足,例如購置了消毒液機放在大廈大堂,但酒精搓手液遲遲未到貨,「另外仲有唔少衛生用品未清到關,老實講,淨係清關都講咗兩個星期啦」,故不敢想像其他單楝樓、三無大廈的困境。

李雪英坦言,香港人現時齊心抗疫、並非歧視要家居隔離的人士,但政府指引欠奉,置所有社區人士於險境,「就當每日過關人次大減,減到5萬、3萬,你係咪處理得到?又當大部份入境人士都無染病,但只要一個人有病,附近所有人都有風險,咁係咪應該確保每個人、每棟大廈都做足準備?淨係從大廈、屋苑管理角度,已經睇到政策上好多缺失﹗」